साउन।३।इटहरी
इटहरी उपमहानगरपालिका वडा नम्बर–४ मा रहेकाे थारु पोखरीमा यस अघिको इटहरी सरकारले निर्माण सुरु गरेको संरचना हालको इटहरी सरकारलाई समस्याको विषय बनेको छ ।
२०७४ सालको स्थानीय तह निर्वाचनबाट निर्वाचित इटहरी सरकारले आर्थिक वर्ष २०७८–२०७९ को बजेटबाट इटहरी–४ स्थित थारु पोखरीमा ब्रह्माको मूर्ति बनाएको थियो । मूल्य अभिवृद्धि कर सहित ३ लाख ८७ हजार ४ सय ६ रुपैया ३२ पैसा लागतमा २०७९–१–८ गते आयोजना सुरु भइ २०७९–३–२९ गते सम्पन्न हुनेगरी सम्झौता अनुसार काम गरियो । तर थारु जातिको सांस्कृतिक पहिचान बोकेको उक्त पोखरीबाट सो संरचनाको थारु कल्याणकारी सभा–४ नम्वर वडा कार्यसमिति इटहरीले आपत्ति जनाएको छ ।
समितिले इटहरी वडा नम्वर ४ का वडा अध्यक्ष भक्त लामा तामाङ र इटहरी नगर प्रमुख हेमकर्ण पौडेलसमक्ष उक्त संरचना हटाउनु पर्ने माग सहितको ज्ञापन पत्र बुझाएको छ । उक्त पोखरीमा ब्रह्माको मूर्ति स्थापना गरेर थारुहरुको पहिचानमा धावा बोल्ने कार्य भएको उल्लेख गर्दै उक्त मूर्ति अविलम्ब हटाउन ज्ञापन पत्रमा माग गरिएको छ ।
साथै इटहरी उपमहानगरपालिका कार्यालयले थारु समुदायलाई नगरको पहिलो जातीको रुपमा घोषणा गरेको भए पनि थारुको भावना परम्पराप्रति अंकुश लगाएको समितिको आरोप छ ।
उक्त संरचना सम्बन्धमा आफू अनविज्ञ रहेको इटहरी–४ का वडा अध्यक्ष भक्त लामा तामाङ बताउँछन् ।
थारु महिला सभा केन्द्रिय सचिव शुशीला चौधरी भने स्थानीय सरकारले आफु चोखिन यस विषयमा थाहा छैन भनेको बताउँछिन् । साथै आउने जीतीयासम्म उक्त मूर्ति स्थानान्तरण गर्न स्थानीय सरकार अटेर भएमा आफुहरु चुप लागेर नबस्ने चेतावनी दिएकाे छ ।उक्त निर्णय पूर्व सरकारले गरेको उल्लेख गर्दै इटहरी नगर प्रमुख हेमकर्ण पौडेलले उक्त मागपत्र कार्यपालिका बैठकमा प्रस्तुत गरिने विश्वास व्यक्त गरे । साथै उनले उक्त योजना सम्पन्न गर्दा लागेको खर्चको सम्बन्धमा पनि छानविन गर्न आन्तरिक तयारीमा रहेको जानकारी गराए ।
अघिल्लो इटहरी सरकारले उक्त परियोजना आफ्नो कार्यकाल सकिनै लाग्दा हतार हतारमा सम्झौता गरेर छोटो अवधीमै काम सम्पन्न गरेको छ भने पोखरीको सौन्दर्यकरणको नाममा बजेट खर्च गरे पनि पोखरीको सरसफाई भने गरिएको छैन ।