पुस। १९।कानेपोखरी
कानेपोखरी गाउँपालिकाका करदाताले अब करसम्बन्धी सेवा गाउँपालिकाबाटै प्राप्त गर्न सक्ने भएका छन्। करदाता सेवा कार्यालयले हालसम्म गर्दै आएका सेवाहरू स्थानीय तहबाटै प्रवाह गर्ने उद्देश्यले आन्तरिक राजश्व कार्यालय दमक, झापा र कानेपोखरी गाउँपालिका बीच औपचारिक सम्झौता सम्पन्न भएको छ।
आज कानेपोखरी गाउँपालिकामा आयोजित कार्यक्रममा आन्तरिक राजश्व कार्यालय दमकका प्रतिनिधि, गाउँपालिका अध्यक्ष राजमती इङ्नाम र वडाध्यक्ष चरण गुरुङको उपस्थितिमा गाउँपालिकाका प्रमुख प्रशासकीय अधिकृत हिराकुमारी यादवले सम्झौतामा हस्ताक्षर गरेकी हुन्।
सम्झौतासँगै कानेपोखरी गाउँपालिकाले आगामी माघ २ गतेदेखि औपचारिक रूपमा करदाता सेवा प्रवाह गर्ने जनाएको छ। यस व्यवस्थाले करदातालाई सेवा लिन दमकसम्म धाउनुपर्ने बाध्यता हट्ने, समय र खर्चको बचत हुने तथा सेवा अझ प्रभावकारी र नागरिकमैत्री बन्ने अपेक्षा गरिएको छ।
स्थानीय तहबाटै करदाता सेवा उपलब्ध गराउने यो पहलले कर प्रशासनलाई थप सरल, पारदर्शी र पहुँचयोग्य बनाउने विश्वास गरिएको छ।