भदाै।२८।कानेपाेखरी
मोरङको रंगेली नगरपालिकाविरुद्ध नेपाली कांग्रेसले केही दिनयता आन्दोलन गरिरहेको छ ।जसमा नगरपालिकाले भूमि तथा मालपोत कर वृद्धि गरेको भन्दै विरोधमा भइरहेको आन्दोलनमा अनेक दृष्य देखिन्छ । एउटा राजनीतिक दलले एउटा पालिकाविरुद्ध गरेको आन्दोलनलाई अर्को पालिकाका प्रमुखहरुले साथ दिइरहेका छन् ।
विराटनगर महानगरपालिकाका मेयर नागेश कोइराला आफैं आन्दोलनकारी बनेर नाराबाजी र प्रदर्शनमा सहभागी भए । मेयरका रूपमा नभइकन कांग्रेसको जिल्ला उपसभापति बनेर आफू आन्दोलनमा सहभागी भएको उनको बताए ।
धनपालथान गाउँपालिकाका प्रमुख जीवछप्रसाद गच्छदार पनि रंगेलीका पीडित जनताजस्तै गरेर आन्दोलनकारी बन्न पुगे । आन्दोलनमा उपस्थिति र सक्रियता हेर्दा रंगेली नगरपालिकाले बढाएको करका कारण गच्छदार सबैभन्दा बढी पीडित भएजस्तो देखिन्थ्यो ।
आन्दोलनकारीको सहयोगी बनेर १ जना शिक्षक प्रहरीमाथि जाइलागेको देखिन्छ । घटना बिहान ९ः३० देखि १० बजेतिरको हो । विद्यालयमा पढाउन छाडेर आन्दोलनको साक्षी बन्न पुगेका शिक्षक कमलेश मण्डल प्रहरीमाथि जाइलागेका हुन् ।
एउटा पालिकाविरुद्ध राजनीतिक दलले गरिरहेको आन्दोलनको अग्रमोर्चामा अर्को पालिका प्रमुखहरु देखिनु आश्चर्यजनक विषय भएको सरोकारवालाहरु बताउँछन् । प्रदर्शनमा पालिका प्रमुखहरु सशरीर सहभागी भएको विवादास्पद विषय सेलाउन नपाउँदै आन्दोलनमा शुक्रबार अर्को अनौठो दृष्य देखियो ।
आन्दोलनकारीको सहयोगी बनेर १ जना शिक्षक प्रहरीमाथि जाइलागेको देखिन्छ । घटना बिहान ९ः३० देखि १० बजेतिरको हो । विद्यालयमा पढाउन छाडेर आन्दोलनको साक्षी बन्न पुगेका शिक्षक कमलेश मण्डल प्रहरीमाथि जाइलागेका हुन् ।
उनी रंगेली नगरपालिका–७ स्थित चिनामारी आधारभूत विद्यालयका शिक्षक हुन् । नेपाली कांग्रेस रंगेली नगर सभापति जगरनाथ मण्डलका छोरा उनी कांग्रेसको शुभेच्छुक संस्था नेपाल शिक्षक संघको साधारण सदस्यसमेत छन् ।
आन्दोलनको नेतृत्व जगरनाथ र कांग्रेस मोरङका सचिव मोदराज घिमिरेले गरिरहेका छन् । बुवाको नेतृत्वमा चलेको आन्दोलनमा पुगेका शिक्षक कमलेशले विवादास्पद भूमिका निर्वाह गरेको भिडियोमा प्रष्टसँग देख्न सकिन्छ ।
आन्दोलनकारीहरु बिहान ९ बजे नै नगरपालिकाको गेटअगाडि जम्मा भएका थिए । नगरपालिकाका कर्मचारीलाई कार्यालय प्रवेशमा अवरोध गर्दै दुव्र्यवहार र हातपात गरेका आन्दोलनकारीले शुक्रबार बजार तथा यातायात बन्द गराए । आन्दोलन अराजक हुन थालेपछि प्रहरीले धरपकड गर्न थाल्यो ।
इलाका प्रहरी कार्यालय रंगेलीका इन्सपेक्टर सन्तोषकुमार खड्काको नेतृत्वमा प्रहरी परिचालन गरेका थिए । आन्दोलनकारीलाई तितरबितर बनाउन लागेको प्रहरीलाई शिक्षक मण्डलले अवरोध गर्न खोजेको प्रष्टसँग देख्न सकिन्छ । इन्सपेक्टर खड्काको नाकमा औंला ठड्याउँदै उनी प्रहरीप्रति आक्रामक शैलीमा प्रस्तुत भएको भिडियोमा देखिन्छ ।
आन्दोलनकारीलाई हटाएर बजार र यातायात खुलाउनुपर्ने दबाबमा रहेको प्रहरीले कमलेशको हर्कतलाई भने वास्ता गरेन । तर, आन्दोलनमा गएर १ जना शिक्षकले त्यस्तो हर्कत देखाउन मिल्थ्यो कि मिल्दैन थियो भनेर प्रश्न उठेको छ ।
सरकारी, सामुदायिक तथा संस्थागत शिक्षालयका प्राध्यापक, शिक्षक वा कर्मचारी राजनीतिक दलको सदस्य हुन नपाउने कानुनी व्यवस्था पूर्ण कार्यान्वयन गरिने घोषणा गत जेठमा सरकारले गरेको थियो । सरकारले आगामी आर्थिक वर्षको नीति तथा कार्यक्रममा उक्त व्यवस्था कार्यान्वयन गरिने उल्लेख गरेको छ ।स्थानीयका अनुसार कमलेशले खुलेर आन्दोलनमा सहयोग गरिरहेका छन् । लुकेर ‘साइड’बाट आन्दोलनकारीलाई उकास्ने गरेको आरोप लागेको छ । त्यो आरोप सत्य रहेको कुरालाई शुक्रबारको दृष्यले बल पुर्याएको छ ।
पढाउन छाडेर शिक्षक आन्दोलनमा सहभागी भएपछि चर्को आलोचना भइरहेको छ । स्थानीयहरु विद्यालय समयमा पढाउन छाडेर कमलेश आन्दोलनमा पुगेको बताउँछन् । आन्दोलनमा आएका मात्रै हैनन्, उनले उग्र शैलीमा प्रहरीसँग विवाद गरेको त प्रष्टै देखिन्छ ।
‘म शिक्षक हुँ’भन्ने दम्भ देखाएर प्रहरीलाई हातपातको प्रयास नै गरेको प्रत्यक्षदर्शीको भनाइ छ । विद्यालय समयमा विद्यालय जानुपर्नेमा आन्दोलनमा सहभागी भएपछि विद्यार्थीहरुले पढ्न नपाएको गुनासो अभिभावकहरुको छ ।
कमलेशमाथि पढाउनेभन्दा पनि राजनीतिक गतिविधिमा बढी सक्रिय रहने गरेको आरोप छ । ‘विद्यालयमा पढाउन जानुपर्ने मान्छे राजनीति गरेर हिँड्छन्,’ एक अभिभावकले भने, ‘हाम्रा छोराछोरीलाई चैं कसले पढाउँछ ?’ यस्ता शिक्षकलाई कारबाही हुनुपर्ने उनले बताए । सरकारी तलब र सेवा सुविधा लिएपनि पढाउन छाडेर पार्टीका कार्यक्रममा सक्रिय हुने गरेको गुनासो अभिभावक गर्छन् ।
शिक्षक कमलेश भने आफूले इन्सपेक्टरसहितका प्रहरीलाई संयमित हुन आग्रह गरेको दाबी गर्छन् । ‘म आन्दोलनमा गएकै छैन । नेपाल बैंकनजिक उभिएको थिएँँ । आन्दोलनकारीलाई लखेट्दै प्रहरी आएको देखें । त्यहाँभित्र मेरा भाइहरु पनि रहेछन् । इन्सपेक्टर चिनजानकै भएकाले प्रहरीलाई संयमित हुन आग्रह मात्रै गरेको हुँ,’ उनी भन्छन् ।
घटना केही नभएको र अतिरञ्जित मात्रै गर्न खोजिएको दाबी कमलेशको छ । ‘मेरो मर्यादा मलाई थाहा छ । आन्दोलन नगरपालिकातिर थियो । म नेपाल बैंक छेउमा थिएँ । आन्दोलनमा गएकै छैन,’ उनी भन्छन् । शिक्षक भएर आन्दोलनस्थलमा चैं कसरी देखिनु भयो त ? भन्दा उनले जवाफ दिन सकेनन् ।
बिहान साढे ९ बजेसम्म त्यहाँ रहेपनि दिउँसो स्कुल गएको र स्कुलको कार्यक्रम सकिएपछि मात्रै फर्किएको कमलेशको भनाइ छ । आन्दोलनमा सहभागी भएको कुनै ‘फुटेज’ देखाउन सकेमा आफू कारबाही भोग्न तयार रहेको उनले बताए । आफ्नो दायित्व पढाउने भएकाले आन्दोलनमा पार्टीको झण्डा बोकेर नजाने उनी बताउँछन् ।
मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले घटना के भएको हो भनेर बुझ्ने काम भइरहेको बताए । रंगेलीमा परिस्थिति भड्किन नदिन ठूलो संख्यामा सुरक्षाकर्मी परिचालन गरिएको जानकारी उनले दिए ।
