जनताको सुरक्षामा खटिने प्रहरी आफैं तीन सटरमा बस्न बाध्य ।।थारू पाेर्टल

मोरङको रंगेली नगरपालिका ९ स्थित दोहमना इलाका प्रहरी कार्यालयमा कार्यरत नेपाल प्रहरीका कर्मचारीहरू पर्याप्त आवास र कार्यालय भवनको अभावमा तीनवटा सटरभित्रको साँघुरो कोठामा बस्न बाध्य रहेका छन । करीब ३४ वर्षदेखि दोहमना क्षेत्रका बासिन्दाको जिउधनको सुरक्षा गर्दै आएको उक्त प्रहरी कार्यालयको पुरानो भवन जीर्ण बनेपछि नयाँ भवन निर्माणको काम सुरु गरिएको थियो। प्रदेश सरकारको करिब ५० लाख रुपैयाँको पहिलो किस्ताबाट भवनको जग तथा फाउन्डेसन निर्माणकार्य सम्पन्न भएता पनि थप बजेट निकासा नहुँदा निर्माण कार्य विगत छ महिनादेखि पूर्ण रूपमा बन्द भएको छ। हाल निर्माणस्थलमा फाउन्डेसनमा रडहरु मात्रै ठडिएका छन्।

लामो समयदेखि काम रोकिँदा पिलरकाे छडहरुमा खिया लाग्न थालेको स्थानीयले बताएका छन्। प्रदेश सरकारले दोहमना इलाका प्रहरी कार्यालयसँगै अमरदह प्रहरी चौकी र बलडाँगा प्रहरी चौकीको भवन निर्माण पनि सुरु गरेकामा ती आयोजनाहरू समेत अधुरै अवस्थामा रोकिएको स्थानीयहरुले बताए । दोहमना इलाका प्रहरी कार्यालयले बनकोल, फर्सिडाँगी, बेलचोक, दर्वेशा र बटरवारीलगायत क्षेत्रको शान्ति–सुरक्षाको जिम्मेवारी सम्हाल्दै आएको छ।

हाल असईको कमाण्डमा जम्मा सात जना प्रहरी कर्मचारीले सेवा दिइरहेका छन्। स्थानीय सुरज यादवले भवन निर्माण अधुरै रहनु दुःखद भएको र उनले भवन निर्माण छिटो सम्पन्न गर्नका लागि जिल्ला प्रहरी कार्यालय मोरङ र जिल्ला प्रशासन कार्यालय मोरङमा पटक–पटक जानकारी गराए पनि हालसम्म बजेट निकासा नभएको उनले बताए। स्थानीयका अनुसार सरकारले भवन निर्माणका लागि जग हालेर काम रोक्दा चौबीसै घण्टा जनताको सेवामा खटिने प्रहरी कर्मचारीहरू तीनवटा सटरभित्र बस्न बाध्य भएका छन्, जुन राज्यका लागि पनि लाजमर्दो अवस्था भएको हुन थालेको छ ।

दोहमना बजारमा प्रत्येक बिहीबार र आइतबार साप्ताहिक हाट लाग्ने भएकाले त्यस क्षेत्रमा सुरक्षा व्यवस्थापनको जिम्मेवारी पनि यही प्रहरी कार्यालयले निर्वाह गर्दै आईरहेको छ। बजारको सुरक्षा, अपराध नियन्त्रण तथा आकस्मिक घटनामा तत्काल परिचालन हुने प्रहरीका लागि आधारभूत आवाससमेत नहुनु सम्बन्धित निकायको बेवास्ताको कारणले गर्दे प्रहरीहरु समस्यामा पर्ने गरेका छन । यस विषयमा जिल्ला प्रहरी कार्यालय मोरङका प्रहरी प्रमुखका अनुसार दोहमना इलाका प्रहरी कार्यालयको भवन निर्माणका लागि आवश्यक कागजी प्रक्रिया अगाडि बढिसकेको र भवन निर्माण सम्पन्न गर्न आवश्यक थप बजेटका लागि सम्बन्धित निकायमा प्रस्ताव तथा आवश्यक कागजात पठाइसकिएको र बजेट निकासा हुनेबित्तिकै रोकिएको निर्माण कार्य पुनः सुरु गरिने उनले बताए।