१० महिनाकी छोरीलाई ढाल बनाएर ब्राउन सुगर तस्करी गर्ने प्रयास।थारू पाेर्टल

मोरङको रंगेलीमा १० महिनाकी छोरी बोकेको ‘क्यारी ब्याग’मा ३ ग्राम ब्राउन सुगर (खैरो हेरोइन) लुकाएर नेपाल भित्र्याउने प्रयास गरेको आरोपमा एक महिलासहित तीन जनालाई प्रहरीले पक्राउ गरेको छ। पक्राउ पर्नेमा कानेपोखरी–७ की २२ वर्षीया सुष्मिता लिम्बू, रंगेली–६ का २३ वर्षीय ताराचन्द मण्डल र रंगेली–७ का १८ वर्षीय आयुष साह रहेकाे रंगेली प्रहरीले जनाएको छ ।

शनिबार रंगेली ४ नेवा टोलमा सुष्मितामाथि शंका लागेपछि चेकजाँच गर्दा बच्चा बोक्ने ‘क्यारी ब्याग’को अगाडिको गोजीबाट ३ ग्राम ब्राउन सुगर बरामद गरेको थियो। प्रहरीका अनुसार सुष्मिताले भारतबाट लागुऔषध ल्याएर ताराचन्द र आयुषलाई दिन लागेको प्रारम्भिक अनुसन्धानबाट खुलेपछि दुवै जनालाई पनि पक्राउ गरिएको हो। प्रहरीका अनुसार बच्चा बोकेको देखाएर शंका नलाग्ने मनोविज्ञानको दुरुपयोग गरी लागुऔषध तस्करी गर्ने नयाँ प्रवृत्ति देखिएको भन्दै घटनाबारे थप अनुसन्धान भइरहेको छ।