साउन।२२।शुक्रबार
जिल्ला प्रशासन कार्यालय मोरङले रङ्गेली नगरपालिका–७ स्थित ऐतिहासिक तथा धार्मिक महत्व बोकेको श्री संसारी माईस्थान मन्दिरको व्यवस्थापनलाई व्यवस्थित बनाउन पाँच सदस्यीय अन्तरिम कार्यसमिति गठन गरेको छ। प्रमुख जिल्ला अधिकारीको निर्णयअनुसार मन्दिर व्यवस्थापन समितिका पदाधिकारीहरूले सामूहिक राजीनामा दिएपछि संस्थाको दर्ता यथावत् राख्दै विधानबमोजिम साधारणसभा सम्पन्न गरी नयाँ कार्यसमिति गठन गर्ने उद्देश्यले अन्तरिम कार्यसमिति गठन गरिएको हो।
गठित अन्तरिम कार्यसमितिको संयोजकमा रङ्गेली नगरपालिकाका प्रमुख प्रशासकीय अधिकृत रहेका छन्। सदस्य हरुमा जनता बहुमुखी क्याम्पस रङ्गेलीका क्याम्पस प्रमुख, जिल्ला प्रशासन कार्यालय मोरङका एक जना प्रशासकीय अधिकृत तथा इलाका प्रहरी कार्यालय रङ्गेलीका प्रमुख रहेका छन्। सदस्य–सचिवको जिम्मेवारी रङ्गेली नगरपालिकाको आर्थिक प्रशासन शाखा प्रमुख लाई जिम्मेवारी दिइएको छ।
जिल्ला प्रशासन कार्यालयले अन्तरिम कार्यसमितिलाई तीन महिनाभित्र संस्थाको विधानअनुसार सदस्यता वितरण गरी जिल्ला प्रशासन कार्यालयको रोहबरमा साधारणसभा सम्पन्न गरेर निर्वाचित नयाँ कार्यसमितिलाई जिम्मेवारी हस्तान्तरण गर्न निर्देशन दिएको छ। त्यस्तै, संस्थाको स्थापना भएदेखि हालसम्मको आय–व्ययको स्वतन्त्र लेखापरीक्षण गराई प्रतिवेदन सार्वजनिक गर्न, जनप्रतिनिधिको उपस्थितिमा सार्वजनिक परीक्षण गर्न तथा नयाँ कार्यसमिति गठन नहुञ्जेलसम्म मन्दिरको आय–व्यय व्यवस्थापन गर्न पनि निर्देशन दिइएको छ। निर्णयअनुसार मन्दिरको बैंक खाता नयाँ कार्यसमिति गठन नहुँदासम्म रङ्गेली नगरपालिकाका प्रमुख प्रशासकीय अधिकृत र आर्थिक प्रशासन शाखा प्रमुखको संयुक्त दस्तखतबाट सञ्चालन हुनेछ। मन्दिरमा उठेको भेटी तथा अन्य आम्दानी बैंकमा दाखिला गरी नियमित खर्च भने निवर्तमान कार्यसमितिको रोहबरमा अन्तरिम कार्यसमितिको निर्णयबमोजिम मात्रै गर्न पाइने व्यवस्था गरिएको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।