कानेपोखरी
नेपाली कांग्रेसको राष्ट्रिय राजनीतिमा आन्तरिक चुनावी रौनक बढिरहेका बेला कोशी प्रदेश अन्तर्गत मोरङमा पनि महाधिवेशनको सरगर्मी तीव्र भएको छ। यसै क्रममा नेपाली कांग्रेसको १५औँ महाधिवेशनअन्तर्गत मोरङ क्षेत्र नं. ३ (क) बाट युवा महिला नेतृ मन कुमारी गुरुङ ले प्रदेश महाधिवेशन प्रतिनिधि पदका लागि आफ्नो उम्मेदवारी घोषणा गर्नुभएको छ।
लामो समयदेखि नेपाली कांग्रेसको संगठन निर्माण र सामाजिक सेवामा सक्रिय रहँदै आउनुभएकी गुरुङले पार्टीभित्र सांगठनिक सुधार र युवा तथा महिलाहरूको नेतृत्वदायी भूमिका स्थापित गर्नका लागि आफ्नो उम्मेदवारी रहेको बताउनुभएको छ। ‘राष्ट्रियता, लोकतन्त्र र समाजवाद’ को मूल सिद्धान्तलाई आत्मसात् गर्दै पार्टीलाई स्थानीय स्तरमा थप बलियो र सुदृढ बनाउन आफू लागिपर्ने उहाँको प्रतिबद्धता छ।
विशेष गरी कानेपोखरी र आसपासको क्षेत्रमा शैक्षिक तथा सामाजिक क्षेत्रमा समेत नेतृत्वदायी भूमिका निर्वाह गरिसक्नुभएकी नेतृ गुरुङको उम्मेदवारीलाई स्थानीय कार्यकर्ता, महाधिवेशन प्रतिनिधि र शुभेच्छुकहरूले उत्साहका साथ लिएका छन्। क्षेत्र नं. ३ (क) भित्रका क्षेत्रीय प्रतिनिधिहरूले आफ्नो काम र योगदानको उच्च मूल्याङ्कन गर्दै आसन्न निर्वाचनमा आफूलाई अमूल्य मत दिएर विजयी गराउनेमा उहाँ पूर्ण विश्वस्त देखिनुहुन्छ।
पार्टीभित्र निष्ठावान् र जुझारु छविकी नेतृका रूपमा चिनिने मन कुमारी गुरुङको उम्मेदवारीले कोशी प्रदेश कार्यसमिति र प्रादेशिक संरचनामा महिलाहरूको प्रतिनिधित्व र आवाजलाई अझ प्रभावकारी ढंगले स्थापित गर्ने अपेक्षा गरिएको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।