रङगेली,माघ २१ — लुथरन सामुदायिक कल्याण समाज (LCWS) ले रंगेली नगरपालिका र धनपालथान गाउँपालिकालाई कम्प्युटर, ल्यापटप तथा प्रिन्टर हस्तान्तरण गरेको छ।

भदौ २४ गते भएको जेनजी आन्दोलनका क्रममा रंगेली नगरपालिका र धनपालथान गाउँपालिकाका कार्यालयमा रहेका कम्प्युटर तथा प्रिन्टर जलेर नष्ट भएपछि सेवाग्राहीलाई सेवा दिन असहजता सिर्जना भएको थियो। सोही अवस्थालाई मध्यनजर गर्दै सामाजिक उत्तरदायित्वअन्तर्गत लुथरन सामुदायिक कल्याण समाज, रंगेली–२ लक्ष्मीपुरले आवश्यक सामग्री सहयोग गरेको हो।

रंगेली नगरपालिकाका प्रशासकीय अधिकृत प्रदीप कुमार साहले जेनजी आन्दोलनपछि प्रशासनिक कामकाजमा समस्या देखिएको भन्दै संस्थासँग आवश्यक सामग्रीका लागि अनुरोध गरिएको बताए। उनले लुथरन समाजले विगतदेखि विभिन्न सामाजिक कार्यमा सहयोग गर्दै आएको उल्लेख गर्दै यसपटकको सहयोगका लागि धन्यवाद व्यक्त गरे।

संस्थाका पदाधिकारीहरूले रंगेली नगर प्रमुख भुमा पराजुली र प्रशासकीय अधिकृत प्रदीप कुमार साहको उपस्थितिमा सामग्री हस्तान्तरण गरेका थिए।