माघ,१९
कानेपोखरी ।
मोरङको कानेपोखरी –७ ऐतिहासिक कानेपोखरीमा एक पुरुष पाैडीखेल्नेक्रममा डुबेर मृत्यु भएको छ ।शनिबार लगभग १ बजे दिउँसो पोखरीमा पौडी खेल्ने क्रममा कानेपोखरी ७ बस्ने लगभग ३५ वर्षीय कुलबहादुर गिरीको मृत्यु भएको छ।
पानीमा डुबे पछि वनभोज खानेहरुले नगरप्रहरीलाई खबर गरेका थिए । नगरप्रहरीले आधा घण्टा सम्म खोजतलास गर्दा नभेटे पछि सुनसरी स्थित सशस्त्र प्रहरी बल नेपाल नं. १ बराहा बाहिनीको उद्धार टोली(गोताखोर)ले पोखरीको पानी भित्रबाट शव निकालेको थियाे ।
शवलाई मृतकका आफ्न्त बुहारीले बुझेका थिए भने शव पोष्टमार्टमको लागि उर्लाबारीकाे मंगलबारेमा रहेकाे मदन भण्डारी ट्रमा सेन्टरमा लगिएको नगरप्रहरी युवराज भुजेलले बताए ।
पोखरी २० फिट गहिराई छ । अहिलेको अवस्थामा पोखरीमा पानी सुकेर १० फिट गहिराई भएको ग्रामिण सुधार सामुदायिक वन समूहका पूर्व अध्यक्ष नविन राईले जनाएको छ ।
मृतक गिरीको कानेपोखरी ७, आइतबारेमा घर नभएपनि बस्दै आएका थिए । उनका आफ्न्त लेटाङमा भाईबुहारी रहेको र झापामा दाजूभाउजु रहेको रमाइलो प्रहरी चौकीका सई मोहन प्रसाद प्रधानले बताए ।
शनिबार ऐतिहासिक पोखरीमा वनभोज खानेको भिड थियो । वनभोज खानेका ग्रुपमा गएर खानेकुराहरु मागेर खाएका थिए । त्यस पछि पौडी खेल्न पोखरीमा पसेको एक प्रत्यक्षय दर्शीले प्रहरीलाई बताए । स्थानीयका अनुसार आइतबारेमा पनि मागेर खाने गरेका थिए ।