असार १७, ।रँगेली
धार्मिक सहिष्णुता र आपसी सद्भावको उदाहरण प्रस्तुत गर्दै मोरङकाे रँगेलीस्थित प्रसिद्ध श्री संसारीमाई मन्दिरमा मुस्लिम समुदायका एक व्यक्तिले आफ्नो भाकल पूरा भएपछि पूजा–आराधना गरेका छन्।
लामो समयदेखि मनमा राखेको भाकल पूरा भएको विश्वासपछि उनी मन्दिरमा पुगेर विधिपूर्वक पूजा, दर्शन तथा प्रसाद अर्पण गरेका हुन्। मन्दिरका पुजारीबाट वैदिक विधिअनुसार पूजा सम्पन्न गरिएको थियो।
स्थानीयका अनुसार श्री संसारीमाई मन्दिरमा हिन्दू धर्मावलम्बी मात्र नभई मुस्लिम, किराँत, बौद्धलगायत विभिन्न धर्म तथा समुदायका श्रद्धालुहरू पनि मनोकामना लिएर आउने र भाकल पूरा भएपछि पुनः पूजा–दर्शन गर्ने परम्परा रहँदै आएको छ।
भाकल पूरा भएको विश्वासका साथ मन्दिरमा पुगेका ती व्यक्तिले आफ्नो आस्था व्यक्त गर्दै मनोकामना पूरा भएकोमा देवीप्रति कृतज्ञता प्रकट गरेका थिए।मन्दिर व्यवस्थापन समितिले धार्मिक आस्था व्यक्तिगत विषय भएको उल्लेख गर्दै सबै धर्म र समुदायका श्रद्धालुलाई समान सम्मानका साथ स्वागत गर्ने गरिएको जनाएको छ।
स्थानीय बुद्धिजीवीहरूले यस्ता घटनाले नेपालमा रहेको धार्मिक सहिष्णुता, सामाजिक एकता र पारस्परिक सम्मानको संस्कृतिलाई अझ सुदृढ बनाउने विश्वास व्यक्त गरेका छन्।