झापा -११ ले भारतको यूकेएफसी कर्साङलाई (५-१) पराजित गर्दै फाइनलमा प्रवेश ।थारू पाेर्टल

अन्तर्राष्ट्रिय आमन्त्रण तेस्रो पथरी शनिश्चरे गोल्डकप–२०८३ अन्तर्गत आज भएको पहिलो सेमिफाइनल खेलमा झापा–११ एफसीले भारतको यूकेएफसी कर्साङलाई पराजित गर्दै फाइनलमा प्रवेश गरेको छ। पथरी शनिश्चरेमा जारी तेस्रो प्रतियोगिताको आजको खेलमा झापा–११ र यूकेएफसी कर्साङबीच रोमाञ्चक तथा प्रतिस्पर्धात्मक खेल भएको थियो। निर्धारित समयमा झापा–११ जर्सी नम्बर ७ का खेलाडी प्रताप सिंह राईले तीन गोल गर्न सफल भएका थिए भने खेलमा झापा–११ जर्सी नम्बर ९का अर्का खेलाडी फागुराम थारुले दुई गोल गर्न सफल भएका थिए।

यससँगै झापा–११ ले पाँच गोल गरेको थियो भने यूकेएफसी कर्साङले एक गोल गरेको थियो। झापा–११ ले यूकेएफसी कर्साङलाई ५–१ गोलले पराजित गर्दै फाइनलमा आफ्नो स्थान सुरक्षित गरेको छ। आजको पहिलो सेमिफाइनल खेलमा झापा–११ का प्रताप सिंह राई म्यान अफ द म्याच घोषित भएका छन्। उनलाई पथरी–११ फुटबल क्लबका अध्यक्ष सुमन विक र पथरीशनिश्चरे नगरपालिका वडा नम्बर २ का वडा अध्यक्ष नैना राईले ट्रफीसहित नगद ७ हजार ५ सय रुपैयाँ प्रदान गरी पुरस्कृत गर्नुभएको हो। आजको खेलमा पथरी शनिश्चरे नगरपालिका वडा नम्बर २ का वडा अध्यक्ष नैना राई प्रमुख अतिथिका रूपमा उपस्थित हुनुभएको थियो भने कार्यक्रममा अन्य अतिथिहरूको समेत उपस्थिति रहेको थियो ।

अन्तर्राष्ट्रिय आमन्त्रण तेस्रो पथरी शनिश्चरे गोल्डकप–२०८३ अन्तर्गत भोलि हुने दोस्रो सेमिफाइनल खेलमा न्युरोड एनआरटी र नेपाल पुलिस क्लबबीच प्रतिस्पर्धा हुने पथरी–११ फुटबल क्लबका सचिव केशर राईले जानकारी दिनुभएको छ।