कानेपोखरी, असोज २१ ।
मोरङको कानेपोखरी गाउँपालिका–७ स्थित प्रोगेशिप टोलमा किराँत युवा क्लबको आयोजनामा जारी ‘प्रथम किराँत खुल्ला नकआउट फुटबल प्रतियोगिता–२०८३’ को फाइनलमा मातृभूमि एफसी (खोरिया) प्रवेश गरेको छ।
मंगलबार भएको पहिलो सेमिफाइनल खेलमा मातृभूमि एफसीले हिमाल युनाइटेड एफसीलाई टाइब्रेकरमा ३–२ गोल अन्तरले पराजित गर्दै फाइनल यात्रा तय गरेको हो।
निर्धारित समयको रोमाञ्चक खेल १–१ गोलको बराबरीमा सकिएपछि विजेताको टुंगो टाइब्रेकरबाट लगाइएको थियो। टाइब्रेकरमा उत्कृष्ट प्रदर्शन गर्दै मातृभूमि एफसीले हिमाल युनाइटेडलाई पछि पार्न सफल भयो।
जितसँगै मातृभूमि एफसीले प्रतियोगिताको उपाधिका लागि स्थान सुरक्षित गरेको छ। अब उसले फाइनलमा त्रिवेणी एफसीसँग प्रतिस्पर्धा गर्नेछ।
आयोजक किराँत युवा क्लबका अनुसार प्रतियोगिताको फाइनल खेल शुक्रबार हुने तय भएको छ। उपाधिका लागि मातृभूमि एफसी र त्रिवेणी एफसीबीच हुने खेल रोमाञ्चक हुने अपेक्षा गरिएको छ।
स्थानीय स्तरमा फुटबल खेलको विकास तथा खेलाडीको प्रतिभा पहिचान गर्ने उद्देश्यले आयोजना गरिएको प्रतियोगितामा विभिन्न टोलीको सहभागिता रहेको आयोजकले जनाएको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।